Цените на акциите паднаа на европските берзи во понеделникот претпладнето, продолжувајќи го негативниот тренд од минатата седмица, бидејќи инвеститорите не се склони кон ризици, имајќи предвид дека централните банки на западните земји може да ги задржат каматните стапки на зголемените нивоа подолго од очекуваното.
Индексот STOXX 600 на водечките европски акции беше намален за 0,4 отсто во 9,30 часот. Истовремено, лондонскиот FTSE индекс ослабе за 0,34 отсто, на 7.658 поени, додека франкфуртски DAX се лизна за 0,20 отсто, на 15.526 поени, а париски CAC 0,23 отсто, на 7.168 поени.
Пазарите се под притисок поради неодамнешните пораки од американската централна банка. Сепак, банакрите не ги зголемија дополнително каматните стапки на минатонеделната седница, но рекоа дека до крајот на годината би можеле да ги зголемат уште еднаш и да ги задржат на покачени нивоа подолго од очекуваното. Таквото сценарио е најверојатно и за другите централни банки на западните земји, бидејќи инфлацијата не се намалува толку брзо како што се надеваа инвеститорите.
И на повеќето азиски берзи цените на акциите паднаа. Индексот MSCI на азиско-пацифичкиот регион, со исклучок на Јапонија, беше намален за 0,5 отсто околу 9,30 часот, што се лизна недалеку од најниското ниво во последните 10 месеци.
На токиската берза индексот Nikkei порасна за 0,9 отсто, додека цените на акциите во Австралија пораснаа за 0,1 отсто. Во Јужна Кореја, Шангај и Хонгконг тие паднаа меѓу 0,5 и 1,6 отсто.
Од регионот нема вести кои утрово би ги стимулирале пазарите. Во последните недели, кинеските берзи значително пораснаа од време на време, благодарение на новите мерки за стимулирање на економијата. Но, главно се работи за регулаторни концесии насочени кон стабилизирање на пазарот на недвижности и стимулирање на пазарот на капитал, а не за посилни мерки за стимулирање на реалната економија.
Затоа, инвеститорите стравуваат дека ќе продолжи забавувањето на растот на втората по големина светска економија. А утринава агенцијата S&P ја намали проценката за растот на кинеската економија оваа година од 5,2 на 4,8 отсто бидејќи, како што објасни, фискалното и монетарното олеснување и понатаму е ограничено.
