На њујоршки Волстрит се тргуваше претпазливо во понеделникот, бидејќи инвеститорите не се склони кон поризични инвестиции поради конфликтот на Блискиот исток, како и претстојните извештаи кои би можеле значително да влијаат врз насоката на пазарот.
Индексот Dow Jones загуби 0,58 отсто, на 32.936 поени, додека S&P 500 се лизна за 0,17 отсто, на 4.217 поени. Индексот Nasdaq зајакна, пак, за 0,27 отсто, на 13.018 поени.
Внимателно вчера се тргуваше и на европските берзи. Лондонскиот FTSE индекс ослабе за 0,37 отсто, на 7.374 поени, додека франкфуртски DAX зајакна 0,02 отсто, на 14.800 поени, а париски CAC 0,50 отсто, на 6.850 поени.
Инвеститорите не се склони кон поризични инвестиции бидејќи стравуваат од ескалација на конфликтот меѓу Израел и Хамас. Тие, исто така, се внимателни дека американската централна банка би можела повторно да ги зголеми клучните каматни стапки, со оглед на тоа што инфлацијата во САД продолжува да биде далеку над целните нивоа на Fed.
Сепак, приносите на американските државни обврзници се зголемени во последните месеци, што влијае на голем број каматни стапки на заемите, па аналитичарите сметаат дека Fed нема причина дополнително да ги зголемува клучните каматни стапки.
Но, минатата седмица претседателот на Fed, Џером Пауел, ја остави просторот отворена за уште едно зголемување на каматните стапки до крајот на годината. Дури и да нема зголемување на каматните стапки, сѐ појасно е дека тие ќе останат покачени подолг период од очекуваното.
„Сè уште е најважна приказната за интересот. Откако сфати дека каматните стапки ќе останат покачени подолго отколку што се мислеше, пазарот сега се обидува да измери колку долго каматните стапки ќе останат покачени. Јасно е дека пазарот ја прифати идејата дека Fed нема да ги намали каматните стапки во скоро време“, рече Оливер Пурше, потпретседател во „Wealthspire Advisors“.
Оваа седмица инвеститорите ќе се фокусираат на извештајот за бруто домашниот производ (БДП) на САД, како и на податоците за инфлацијата. Предвидено е и објавување на кварталните деловни резултати на голем број технолошки гиганти како „Microsoft“, „Alphabet“, „Amazon“ и „Meta Platforms“.
Цените на акциите на овие компании силно пораснаа оваа година, па S&P 500 и Nasdaq индексот се во голем плус од почетокот на годината. Затоа, инвеститорите се надеваат дека кварталните резултати на овие технолошки гиганти ќе го оправдаат толку силно зголемување на цените на нивните акции.
