Индустриското производство во септември годинава во однос на септември минатата година е зголемено за 4,5 отсто, а само за 0,7 проценти во периодот јануари – септември годинава, во однос на истиот период лани, објави денеска Државниот завод за статистика.
Опаѓање од 10,1 процент е регистриран во секторот Снабдување со електрична енергија, гас, пареа и климатизација. Според главните индустриски групи, пад има кај Трајните производи за широка потрошувачка за 6,8 проценти и кај Нетрајните производи за широка потрошувачка за 1,8 проценти.
Гледано по сектори, индустриското производство во секторот Рударство и вадење на камен во септември 2023 година, во однос на септември 2022 година, бележи пораст од 23,4 проценти, а пораст има и во Преработувачка индустрија од 3,8 проценти.
ДЗС посочува дека зголемувањето во секторот Преработувачка индустрија е резултат, пред сѐ, на зголеменото производство во одделите: Производство на пијалаци, на хемикалии и хемиски производи, на основни фармацевтски производи и фармацевтски препарати и друго.
Според главните индустриски групи, производството во септември 2023 година, во однос на септември 2022 година, бележи пораст кај Интермедијарни производи, освен енергија за 21,5 проценти и Капитални производи за 0,7 проценти.
