Цените на европските акции пораснаа во претпладневното тргување во средата, бидејќи инвеститорите беа охрабрени од извештаите од Велика Британија и Германија за ублажување на инфлацијата, што значи дека тамошните централни банки би можеле да почнат да ги намалуваат каматните стапки следната година.
Индексот STOXX 600 на водечките европски акции во првиот дневен пресек на тргувањето порасна за 0,4 отсто. Истовремено, лондонскиот FTSE индекс зајакна за 1,29 отсто, на 7.736 поени, додека франкфуртски DAX се зголеми за 0,23 отсто, на 16.785 поени, а париски CAC за 0,24 отсто, на 7.590 поени.
Инвеститорите беа охрабрени од фактот што инфлацијата во Велика Британија во ноември падна на 3,9 отсто, од 4,6 отсто претходниот месец.
На пазарите позитивно влијаеше и фактот што производствените цени во Германија паднаа повеќе од очекуваното.
Овие податоци ги поддржуваат надежите на инвеститорите дека европската и британската централна банка го завршија циклусот на зголемување на каматните стапки и дека наскоро ќе следи намалување на цената на парите.
Азиските берзи во средата го следат растот на Волстрит. Цените на акциите пораснаа на повеќето азиски берзи. Индексот MSCI на азиско-пацифичките акции, без јапонските, до истиот дневен пресек како и во Европа порасна за 0,6 отсто. На Токиската берза индексот Nikkei порасна скромно за 1,4 отсто, додека цените на акциите во Австралија, Јужна Кореја и Хонгконг пораснаа меѓу 0,6 и 1,5 отсто. Во Шангај, пак, паднаа за повеќе од 1 процент.
Во Шангај цените на акциите паднаа, бидејќи втората по големина економија во светот растела побавно од очекуваното и нема нови вести за дополнителни големи стимулативни мерки. На берзата во Токио, пак, цените на акциите значително пораснаа втор ден по ред, бидејќи на последната седница во годината, челниците на јапонската централна банка одлучија да задржат исклучително поволна монетарна политика.
И другите азиски берзи го следат натамошниот раст на Волстрит вчера. Dow Jones порасна за 0,68 отсто, додека S&P 500 порасна за 0,59 отсто, а Nasdaq индексот за 0,66 отсто. Најголемата светска берза и натаму е во добро расположение, бидејќи инвеститорите веруваат дека по повеќе од година и половина циклусот на затегнување на монетарната политика е завршен и дека следната година ќе следи намалување на каматните стапки, имајќи предвид дека инфлациските притисоци постепено се олеснување.
До неодамна главна тема на пазарот беше кога Fed ќе го заврши циклусот на зголемување на каматните стапки, а сега најмногу се шпекулира кога и за колку централната банка на САД ќе ги намали каматните стапки следната година. Претставниците на Fed изминатите денови изјавија дека сè уште не го разгледуваат ова прашање, но пазарот проценува дека има повеќе од 60 проценти шанси централната банка да започне со намалување на каматните стапки веќе во март.
И додека челниците на Fed проценуваат дека следната година трипати ќе ги намалат каматните стапки, најверојатно за по 0,25 процентни поени, на пазарот се шпекулира дека следната година е можно да се намалат каматните стапки дури шест пати.
„Пазарот е во моментум бидејќи нема што да го турка надолу во моментов“, вели Рос Мејфилд, стратег во „Baird“ и додавва дека пазарот веројатно е пооптимист за намалување на каматните стапки отколку самиот Fed, па лидерите на централните банки се обидуваат да ја ублажат еуфоријата кај инвеститорите.
Но, засега тоа не им успева. Дотолку повеќе што се чини дека американската економија ќе ја избегне рецесијата, и покрај наглото зголемување на каматните стапки, така што и ова ја поддржува еуфоријата на инвеститорите.
Благодарение на овие тези, на Волстрит, нагорниот тренд на берзанските индекси влезе во осмата недела, при што S&P 500 и Nasdaq ги достигнаа највисоките нивоа во годината, а Dow Jones највисокото ниво во историјата.
