Британскиот принц Вилијам се врати на должноста во средата по операцијата на неговата сопруга Кејт и веста дека кралот Чарлс Трети. боледува од рак, а неговиот помлад брат Хари се враќа во САД откако го посетил нивниот татко.
Престолонаследникот Вилијам ги одложи планираните ангажмани за да се грижи за своите деца, откако 42-годишната Кетрин Мидлтон беше подложена на операција на абдоменот на 16. јануари и помина две седмици закрепнувајќи во болница.
Неговиот татко беше лекуван во истата болница поради зголемена простата пред Бакингемската палата во понеделникот да објави дека дополнителните тестови покажале дека 75-годишниот монарх има рак.
Во средата, 41-годишниот Вилијам го имаше своето прво официјално појавување во јавноста по здравствените проблеми на кралското семејство. Вилијам присуствуваше на церемонијата на државните почести во замокот Виндзор, а подоцна присуствуваше и на хуманитарна гала вечера.
Бидејќи кралот ги одложува јавните обврски поради лекување, а Кејт нема да се врати на своите обврски барем до католички Велигден, товарот ќе падне на преостанатите членови на кралското семејство, особено на сопругата на Вилијам и Чарлс, кралицата Камила.
Коментаторот на случувањaтa во кралското семејство Роберт Хардман вели дека Вилијам веќе презел значителен дел од државните должности кон крајот на владеењето на кралицата Елизабета кога таа имала потешкотии да се движи.
„Во таа смисла, не е толку различно, но очигледно има товар на очекување. Тој ќе мора да биде замена во многу прилики, тој ќе биде како шеф на држава на многу начини, на ист начин како што принцот Чарлс беше кога кралицата беше болна“, рече Хардман за Reuters.
И покрај дијагнозата, Чарлс има намера да продолжи со повеќето кралски должности приватно. Секоја среда ќе разговара со премиерот Риши Сунак по телефон, потврди портпаролот на премиерот.
Бакингемскиот дворец не даде детали за здравствената состојба на Чарлс, освен дека не е рак на простата, но објави дека кралот останува „апсолутно позитивен“ и дека со нетрпение очекува да се врати на јавните обврски што е можно поскоро.
