Англискиот фудбалски гигант Манчестер Јунајтед денеска пријави загуба од 113,2 милиони фунти за фискалната година што заврши на 30 јуни, и покрај рекордните приходи од 661,8 милиони фунти
Клубот од Премиер лигата, кој оваа година делумно беше купен од британскиот милијардер Џим Ретклиф, наведе дека бројките делумно се должат на зголемените трошоци за играчи.
Правилата за профит и одржливост на Премиер лигата им дозволуваат на клубовите да загубат најмногу 105 милиони фунти во период од три години или да се соочат со парични казни. Минатата сезона им беа одземени бодови на Евертон и Нотингем Форест поради прекршување на тие правила.
И покрај загубите, Јунајтед соопшти дека останува во согласност со финансиските правила на Премиер лигата и Европската фудбалска унија (УЕФА).
Во 2022/2023 Манчестер Јунајтед имаше загуби од 28,7 милиони фунти, во 2021/2022 – 115,5 милиони, а во 2020/2021 – 92,2 милиони фунти.
Клубот исто така соопшти дека очекува да генерира меѓу 650 и 670 милиони фунти приход следната година, по рекордните 661,8 милиони фунти оваа година, додека платите се зголемија за 10 отсто на 364,7 милиони фунти.
