Моника Левински на целиот свет му беше позната како љубовница на тогашниот американски претседател Бил Клинтон, а сега стана заштитно лице на модниот бренд Reformation.
Причините поради кои оваа 50-годишна активистка зачекори во светот на модата се, погодувате, политички – да ги поттикне жените да учествуваат на претседателските избори што годинава ќе се одржат во САД.
Поранешната практикантка во Белата куќа, сега активистка, се приклучи на кампањата на брендот Reformation наречена „Ти ја имаш моќта“, со цел да ја подигне свеста за важноста да се излезе на претстојните претседателски избори.
„Гласањето е начин да се слушне нашиот глас и тоа е најмоќниот аспект на демократијата“, рече Левински.
Таа додаде дека учеството на изборите е секогаш важно, но дека влогот е особено голем оваа година, кога „фрустрацијата и апатијата на гласачите се закануваат значително да влијаат на исходот од изборите“.
