Економската слабост полека се прелева на германскиот пазар на труд. Бројот на невработени и стапката на невработеност во декември ги надминаа сезонските очекувања.
Бројот на невработени во Германија на крајот на 2024 година достигна 2,807 милиони, 33.000 повеќе отколку во ноември и 170.000 повеќе од 12 месеци претходно, соопшти во петокот националната агенција за труд.
Стапката на невработеност е зголемена за 0,1 процентен поен од ноември, на шест проценти.
„Во декември започнува зимското замрзнување на пазарот на трудот, па затоа скокот на невработеноста и недоволната вработеност се вообичаени“, изјави претседателката на агенцијата Андреа Налес (Налес).
На крајот на годината вообичаено истекуваат договорите за привремени вработувања, а новите најчесто не се потпишуваат пред Божиќ. Покрај тоа, индустриските сектори кои зависат од временските услови, како што е градежништвото, работат помалку.
Но, и со сезонско прилагодување, бројот на невработени во декември е зголемен за 10.000 во однос на претходниот месец.
Истовремено, забележлив е пад на интересот на стопанството за вработувања. Во декември беа отворени 654.000 работни места, 59.000 помалку од 12 месеци порано.
ДПА
