Пивото е веќе илјадници години дел од човековата култура, и не е чудно што некои тврдат дека има здравствени придобивки. Иако науката може да потврди дел од тие тврдења, постојат и други начини да се постигнат слични ефекти, бидејќи пивото има и свои недостатоци. На пример, содржи алкохол и затоа треба да се консумира умерено. Исто така, треба да се внимава за да се избегнат можни несакани последици како зголемување на телесната тежина, бидејќи пивото содржи скриени калории.
Пивото не е само извор на „празни калории“, туку содржи и одредени хранливи материи кои може позитивно да влијаат на здравјето, како што се витамините од Б групата и некои минерали. Темните пива може да содржат повеќе антиоксиданси поради повисоко ниво на полифеноли, но истовремено имаат и повеќе алкохол и калории.
Според податоци на Министерството за земјоделство на САД, 100 мл стандардно светло пиво содржи:
Енергија: 43 калории
Протеини: 0,46 г
Магнезиум: 6 мг
Фосфор: 13 мг
Калиум: 27 мг
Ако се испие 500 мл пиво, во организмот може да се внесат околу 220 калории, во зависност од видот на пивото. Темните и посилни пива обично содржат повеќе калории поради повисоката содржина на алкохол и дополнителни состојки.
Консумацијата на пиво може да има и некои здравствени придобивки, но клучен елемент е умереноста. Студија објавена во списанието Nutrients наведува дека умерено консумирање пиво може позитивно да влијае на кардиоваскуларното здравје, вклучително и со намалување на ризикот од коронарна срцева болест и подобрување на липидниот профил. Сепак, заштитниот ефект најмногу се поврзува со пива со ниска алкохолна содржина и кај лица што водат здрав начин на живот.
Во Шпанија, земја со богата традиција во консумација на пиво, научниците во 2017 година објавија прегледна студија во угледното списание „Нутришн ривјус“, каде што ги анализираа ефектите на пивото врз здравјето и ја разгледуваа неговата улога во рамки на медитеранската исхрана и начин на живот.
Стручњаците од Медицинскиот факултет во Барселона наведуваат дека умереното консумирање пиво, особено безалкохолното, може да биде во склад со здрав животен стил кај возрасни лица, особено ако се комбинира со урамнотежена исхрана како медитеранската.
Други истражувања укажуваат дека умерената консумација пиво може да биде поврзана со помал ризик од развој на дијабетес тип 2 и одредени невродегенеративни болести, но се потребни дополнителни и поголеми студии за да се потврдат овие наоди.
Прекумерната консумација на пиво може да има штетни ефекти врз речиси секој орган во телото. Според официјалните податоци, долготрајното прекумерно пиење може да предизвика:
- промени во расположението и однесувањето, проблеми со меморијата и координацијата (мозок)
- кардиомиопатија, аритмии, покачен крвен притисок (срце)
- стеатоза (масен црн дроб), хепатитис, фиброза, цироза (црн дроб)
- воспаление и оштетување на панкреасот
- ослабен имунолошки одговор (имуни систем)
