Пејачката Тејлор Свифт повторно е вмешана во правната битка помеѓу актерот Џастин Балдони и актерката Блејк Лајвли околу филмот „Ова завршува со нас“ (It Ends With Us). Федералниот судија Луис Лиман во среда пресуди дека Балдони може да побара транскрипти од комуникациите помеѓу пејачката и Лајвли во врска со филмот, објави „Пејџ сикс“.
„Барањата за текстуални пораки што таа ги разменила со Свифт, а кои се поврзани со филмот и оваа тужба, се разумно прилагодени за да извлечат информации што би можеле да ги докажат или побијат наводите на Лајвли за вознемирување и одмазда“, рече судијата.
Пораките, сепак, мора да бидат поврзани исклучиво со филмот „Ова завршува со нас“ или со овој правен спор меѓу нив.
Адвокатите на Лајвли се обидоа да постигнат спогодба со тимот на Балдони, но не успеаја. Адвокатите на актерката ѝ ги понудија на другата страна сите документи што ги сакаа, освен текстуалните пораки со Свифт, во замена за сите снимки поврзани со филмот и целосни, нецензурирани верзии на комуникациите наведени во тужбата на Балдони. Сепак, адвокатот на Балдони не се согласи на таков договор.
Одлуката на судијата доаѓа откако Лајвли во петокот побара од судот да ја заштити нејзината приватна преписка со Свифт, тврдејќи дека пораките не се клучни за нејзината тужба во декември во која Балдони се обвинува за сексуално вознемирување и координирана кампања за клевета насочена кон уништување на нејзината кариера.
