„Апсолутно неважно е дали би бил заменет во Владата. Никој не треба да мечтае дека засекогаш ќе ја задржи функцијата“, вели министерот за одбрана и потпретседател на ВМРО-ДПМНЕ, Владо Мисајловски, по најавите од премиерот Христијан Мицкоски за големи промени во Владата и во партијата кон крајот на годинава

Министерот за одбрана и потпретседател на ВМРО-ДПМНЕ, Владо Мисајловски, во интервју за „360 степени“ на МРТ 1 вели дека е целосно посветен на функцијата, но дека е подготвен и на промени, коментирајќи ја најавата од премиерот и партиски лидер Христијан Мицкоски за големи кадровски промени кон крајот на годината, по изборите и партискиот конгрес.

„Да, го спомна тоа претседателот. Претпоставувам дека секој што недоволно би дал сè од себе за која било позиција би бил разгледуван“,

изјави Мисајловски и додаде дека приоритет сега се локалните избори.

На прашањето дали лично се чувствува засегнат од најавените промени, Мисајловски одговори:

„Тоа е апсолутно неважно. Никој од нас не се родил со функција. Ниту, пак, треба да мечтае дека засекогаш ќе ја задржи. Треба да имаме здравје, способни за каква било работа.“

За тоа што неговото име се споменува меѓу оние што би можело да бидат сменети, тој вели дека не се оптоварува со тоа.

„Јас сум премногу релаксиран дали ќе има промени или не. Јас гледам да си ја работам работата чесно“,

вели Мисајловски.

Тој вели дека е задоволен од досегашното работење во Министерството за одбрана:

„Кога дојдов како министер, две плати не можеа да се дадат. Не само што се исплатија платите, се исплатија сите долгови по колективен договор од 2017 г. досега. Сите постапки што беа заглавени, пробуваме и даваме максимално сè од себе да стигне оружјето, да стигне опремата.“

Мисајловски се осврна и на разликите меѓу двете министерски позиции што ги има извршувано – транспорт и одбрана. Вели дека двете се различни по природа, но секоја со своја специфична тежина.

„Многу е различно. Сè си има посебна убавина, но во транспортот може да ги гледате проектите директно на терен. Дел од овие проекти не може секој да ги види, различно е“,рече тој.

360