На 80-годишна возраст, актерот им кажа на новинарите дека освен ако не се појави нешто навистина посебно, нема да глуми повеќе во филмови. Неговата последна улога беше во серијата „Френклин“ на Apple TV+, во која го играше Бенџамин Френклин. Снимањето се одвиваше во 2022 година, а беше емитувано во 2024 година.

Даглас објасни дека намерно не работел по 2022 година бидејќи сфатил дека мора да престане. „Работев напорно речиси 60 години и не сакав да бидам еден од оние луѓе што умираат на снимање“, рече тој. Додаде дека е задоволен од својата одлука да направи пауза и, иако не се чувствува официјално пензиониран, не бара активни улоги. Ако се појави нешто навистина извонредно, би го разгледал тоа, но во спротивно е среќен само гледајќи ја својата сопруга, актерката Кетрин Зета-Џонс, како работи.

Актерот рекол дека моментално се обидува да смисли добро сценарио за мал независен филм, но се пошегува дека не бара работа бидејќи неговата игра на голф се подобрува, објави „Гардијан“.

Во 2010 година, Даглас помина низ тешка битка со рак на грлото во четврти стадиум. Во Карлови Вари, тој рече дека имал среќа што избегнал операција за која ќе му биле потребни отстранување на дел од вилицата и губење на гласот – нешто што ќе било фатално за неговата актерска кариера.

За време на фестивалот, Даглас се осврна и на политичката ситуација во Соединетите Американски Држави. Тој изрази загриженост дека неговата земја „флертува со автократијата“ и нагласи колку е ранлива демократијата. Според него, политиката веќе станала профитабилна индустрија, а луѓето влегуваат во неа со комерцијални цели. Тој истакна дека Соединетите Американски Држави одржуваат одреден идеализам кој сега е изгубен. Сепак, актерот одби да навлегува во детали, наведувајќи дека „вестите зборуваат сами за себе“.

„Јас сум загрижен. Загрижен сум и верувам дека е одговорност на секој од нас да бидеме внимателни“, заклучи Даглас.