Чизкејк коцките со боровинки се едноставни за подготовка, разновидни и совршени за секое годишно време и секоја пригода. Ако имате свежи боровинки при рака, не ги занемарувајте, но и замрзнатите ќе завршат работа, пишува „Пун куфер“.
Овој освежувачки колач има дури четири вкусни слоја – кора од бисквити, крем-сирење, слој од овошје измешано со џем и одозгора крцкави трошки (crumble) со суптилна арома на лимон. Уживајте!
Потребни состојки:
За кората:
- Масло, за премачкување на тавчето
- 170 г кекси
- 1 големо јајце
- 70 г растопен путер
- 2 мали лажички шеќер
- 1/4 мала лажичка сол
За филот:
- 450 г крем-сирење (на собна температура)
- 1 големо јајце (на собна температура)
- 50 г шеќер
- 1 мала лажичка екстракт од ванила
- 280 г свежи или замрзнати боровинки
- 60 г џем или слатко од боровинки
За крамбл (крцкава, трошлива смеса, која се користи како горен слој)
- 90 г бело брашно
- 70 г растопен путер
- 3 лажици кафеав шеќер
- 2 мали лажички ситно изрендана кора од лимон
- 1/4 мала лажичка сол
Подготовка:
Кора: Ставете ја решетката на средина од рерната. Загрејте ја рерната на 160 степени. Намастете тавче со димензии 23 x 23 см, па обложете го со хартија за печење. Во блендер или сечко измешајте ги кексите, 1 белка (жолчката зачувајте ја за филот), растопениот путер, шеќерот и солта додека не добиете ситни трошки. Притиснете ја смесата на дното од тавчето и оставете ја на страна.
Фил: Во голем сад изматете го крем-сирењето со средна брзина додека не стане пенливо (1–2 минути). Додајте го шеќерот и матете додека не се соедини. Додајте го целото јајце и зачуваната жолчка, едно по едно, матејќи по секое додавање. Потоа додајте ја ванилата и измешајте сè. Истурете ја смесата врз кората. Во друг сад, нежно изгмечете ги боровинките со вилушка или алат за компири. Измешајте го џемот и прелијте ја смесата врз филот од сирење.
Крамбл: Во сад измешајте брашно, кафеав шеќер, путер, лимонова кора и сол додека не се формираат меки трошки. Ако смесата е премека или премногу топла, ставете ја во фрижидер да се стегне. Поспрете ги трошките врз слојот со џем.
Исечете го на коцки и послужете.
