Лорен Санчез, новата сопруга на основачот на „Амазон“, Џеф Безос, повторно го привлече вниманието на светските медиуми со нејзиното појавување во Париз, овој пат без својот сопруг милијардер. Поранешната телевизиска водителка и претприемачка излезе вчеравечер со група познати пријатели, меѓу кои и актерите Леонардо Дикаприо и Шон Пен, на вечера во елитниот париски ресторан „Лаперус“.
Тоа беше нејзино прво јавно појавување откако се омажи за Безос минатиот месец на раскошен свадбен викенд во Венеција вреден 50 милиони долари. Повеќе од 200 гости, меѓу кои и некои од најпознатите светски познати личности, присуствуваа на тридневната прослава што многумина ја нарекоа „свадба на векот“.
Прославите продолжија минатиот викенд, кога младенците се забавуваа на јахта со Кети Пери и Орландо Блум , кои штотуку објавија дека се разделуваат по 9 години, во Капри. Но, овој пат, Санчез отпатува сама во Париз, каде што им се придружи на холивудските познати личности на вечера за време на Модната недела во Париз.
За таа пригода, 55-годишната Санчез облече црвен латекс фустан од „Версаче“, чија малопродажна цена е повеќе од 3.500 долари, и го комбинираше со црна чанта „Ерме Кели“ од крокодилска кожа, вредна повеќе од 50.000 долари. Кога го напушташе ресторанот, г-ѓа Безос беше опкружена со лично обезбедување, додека љубопитните минувачи и папараците ја гледаа со воодушевување.
Иако многумина се прашуваа каде е Џеф Безос, причината за неговото отсуство наводно е поврзана со бизнисот. Се очекува тој да присуствува на годишниот собир на светските лидери организиран од „Ален и Ко.“ во Сан Вали.
Да потсетиме дека само неколку дена пред патувањето во Париз, Санчез и Безос уживаа на јахта во Медитеранот, но изворите тврдат дека тоа не бил „официјален“ меден месец. Сепак, луксузната свадба, одржана во Венеција, вклучуваше серија тематски забави и музички изведби, со изведувачи меѓу кои беа Ели Гулдинг и Ашер.
