Огледалото понекогаш открива повеќе отколку што би сакале – нерамнини на кожата, тврдоглави наслаги кои не исчезнуваат и покрај редовна физичка активност, па дури и неочекувана чувствителност на допир, пишува „Политика“.
Ако сте пробале различни креми, масажи и вежби, но резултатите се краткотрајни и состојбата се враќа, можеби се соочувате со нешто посериозно од целулит. Ако кожата е болна на допир, а модринки се појавуваат без очигледна причина, можно е да се работи за липедем – наследно и хронично пореметување што не е само естетски проблем.
Целулитот и липедемот често се мешаат бидејќи надворешно можат да изгледаат слично. Целулитот се манифестира како нерамнини и вдлабнатини на кожата, најчесто на бутините, задникот и стомакот. Тој настанува кога масните клетки под кожата се зголемуваат и притискаат врз сврзното ткиво, што создава познат изглед на „кора од портокал“. Иако се поврзува со телесната тежина, се јавува кај речиси сите жени по пубертетот, без оглед на тоа дали се слаби или не. На појавата влијаат генетиката, хормоните и начинот на живот.
Липедемот, пак, е сосема поинаква состојба. Станува збор за абнормално натрупување на масно ткиво, најчесто на нозете и надлактиците, додека стапалата и дланките остануваат недопрени. Оваа состојба е болна, кожата е чувствителна и лесно добива модринки. Најчесто се јавува кај жени и е поврзана со хормонални промени како пубертет, бременост или менопауза. Се смета дека е наследна и не е нужно поврзана со дебелина, иако многу жени со липедем имаат и зголемена телесна тежина.
Клучната разлика меѓу овие две состојби е во тоа што целулитот обично не е болен и може да се ублажи со слабеење, додека липедемот е болен и не реагира на диета или физичка активност. Кај целулитот, маснотиите се натрупуваат неправилно под кожата и создаваат нерамнини, но тоа не предизвикува физичка болка. Липедемот, напротив, се карактеризира со симетрично натрупување на маснотија, осетливост на допир и склоност кон модринки.
Лек за липедем не постои, но симптомите можат да се ублажат со одржување здрава телесна тежина, носење компресивна облека, лимфна дренажа и специјализирана липосукција. За разлика од тоа, третманите за целулит вклучуваат промени во исхраната, физичка активност, масажи, локални креми и естетски процедури како ласерска или радиофреквентна терапија. Но, ефектот обично е привремен бидејќи масните клетки може повторно да се создадат.
Важно е да се направи разлика и меѓу терминот целулит и целулитис. Целулитот е козметички проблем, додека целулитисот е сериозна бактериска инфекција на кожата што бара итен третман со антибиотици. Ако не се лекува, може да предизвика компликации.
Ако чувствувате болка, оток и модринки на нозете кои не исчезнуваат и покрај трудот, не ја отфрлајте можноста дека станува збор за липедем. Посетете лекар за точна дијагноза и соодветна медицинска грижа.
