Мистериозен меѓуѕвезден објект откриен од астрономите минатата недела веројатно е комета која е три милијарди години постара од нашиот Сончев систем и би можела да биде најстарата комета некогаш видена, проценува тим астрономи од Универзитетот во Оксфорд.
Кометата, која е именувана 3I/Атлас, за прв пат е забележана на 1 јули со помош на телескопот Атлас во Чиле, кога била оддалечена околу 670 милиони километри од Сонцето, објави Би-Би-Си.
Моментално е видлив само со помош на многу моќни телескопи и е оддалечен од Земјата речиси колку Јупитер, според прелиминарните наоди презентирани денес на националниот состанок на Кралското астрономско друштво на Велика Британија во Дарам.
Ова е само трет пат да биде откриен објект што доаѓа однадвор од нашиот Сончев систем.
„Сите сме многу возбудени за 3I/Atlas“, изјави за Би-Би-Си астрономот од Универзитетот Оксфорд, Метју Хопкинс.
Тој рече дека врз основа на брзината на кометата, се проценува дека е стара повеќе од седум милијарди години и дека можеби е најзначајниот меѓуѕвезден посетител досега.
Тимот астрономи верува дека бидејќи 3I/Атлас веројатно се формирал околу стара ѕвезда, тој е составен од голема количина воден мраз.
Ова значи дека како што се приближува кон Сонцето подоцна оваа година, енергијата од Сонцето ќе ја загрее површината на објектот, предизвикувајќи загревање на пареата и прашината, што би можело да создаде светлечка опашка.
