Камен од 25 килограми за кој се верува дека потекнува од Марс ќе биде понуден на аукција во „Сотбис“ во Њујорк, со проценета вредност помеѓу два и четири милиони долари. Тоа е најголемиот фрагмент од Марс откриен досега на Земјата, познат како „NWA 16788“.
Како што пишува денес агенцијата АП, каменот ќе биде понуден на продажба во среда како дел од аукција посветена на природната историја, заедно со фосилизираниот скелет на млад диносаурус од видот Ceratosaurus nasicornis, висок над два метри и долг речиси три и пол метри.
Според аукциската куќа, метеоритот најверојатно завршил на Земјата откако бил „отфрлен“ од површината на Марс од удар на астероид врз таа планета, по што патувал 225 милиони километри пред да падне во Сахара, а бил пронајден во Нигер во ноември 2023 година.
Каменот, со црвеникаво-кафеава и сива боја, е околу 70 проценти поголем од втората најголема марсовска карпа пронајдена некогаш на Земјата и сочинува речиси седум проценти од вкупната количина на познат марсовски материјал на нашата планета, објаснува АП.
„Ова е убедливо најголемиот фрагмент од Марс што некогаш сме го пронашле“, изјави Касандра Хатон, заменик-потпретседател за наука и природна историја во „Сотбис“, додавајќи дека карпата е „двојно поголема од она што претходно се сметаше за најголемо парче од Марс“.
Метеоритот е многу редок поради над 77.000 официјално признати метеорити на Земјата, од кои само околу 400 потекнуваат од Марс.
Мал примерок од карпата бил испратен во специјализирана лабораторија, каде што било потврдено дека е материјал од Марс, врз основа на хемиски состав сличен на оној што го забележале американските сонди „Викинг“ за време на нивното слетување на Марс во 1976 година.
На истата аукција ќе биде претставен и фосилизираниот скелет на млад Ceratosaurus nasicornis, пронајден во 1996 година во Вајоминг, во каменоломот „Боун Кабин“.
Диносаурусот живеел во доцниот јура период, пред околу 150 милиони години, а проценетата цена на скелетот е помеѓу четири и шест милиони долари.
Аукцијата во среда е дел од настанот наречен „Гик Недела 2025“, на кој ќе бидат претставени 122 предмети, вклучувајќи метеорити, фосили и ретки минерали.
