Археолозите веруваат дека откриле едно од најстарите познати гробишта, кое датира од пред 100.000 до 110.000 години, во пештерата Тиншемет во централен Израел, пренесува „Вашингтон пост“.
Наодите во пештерата објавени во академско списание претходно оваа година, се темелат на претходните откритија во северен Израел и придонесуваат за сè поголемо разбирање за потеклото на човечкото погребување.
Од особен интерес за археолозите се предметите пронајдени покрај останките што можеби се користеле за време на церемониите за чествување на мртвите и би можеле да фрлат светлина врз тоа како нашите древни предци размислувале за духовноста и задгробниот живот, јавува „АП“.
„Ова е неверојатна револуционерна иновација за нашиот вид“, рече Јоси Заиднер, еден од директорите на ископувањата во Тиншемет и професор по археологија на Еврејскиот универзитет во Ерусалим. „Всушност, ова е првпат да почнеме да го користиме ова“.
Скелетите биле откриени во јами и внимателно наредени во фетална положба, што е познато како положба за погребување, рече Заиднер. Многу од нив биле пронајдени со предмети, како што се базалтни камчиња, животински остатоци или фрагменти од окер, црвеникав пигмент направен од карпи богати со железо.
