Соединетите Американски Држави го осудуваат објавувањето на владата на Хонг Конг на 25 јули за нови налози за апсење и награди за апсење на уште 15 активисти во странство, вклучувајќи ги и оние со седиште во Соединетите Американски Држави, соопшти денес Стејт департментот.
Екстратериторијалното таргетирање на жителите на Хонг Конг кои ги остваруваат своите фундаментални права и слободи претставува форма на транснационално угнетување, рече тој во соопштението.
„Нема да ги толерираме обидите на владата на Хонг Конг да го користи законодавството за национална безбедност за да ги замолчи или заплаши Американците или било кој друг на американска територија“, соопшти Стејт департментот.
Со овој нов налог за апсење и награди за апсење, владата на Хонг Конг продолжува да ја поткопува автономијата што самиот Пекинг им ја вети на луѓето од Хонг Конг по предавањето во 1997 година, се вели во соопштението.
Слободата на говорот и политичкото изразување се основни американски вредности што администрацијата на американскиот претседател Доналд Трамп ќе продолжи да ги брани, нагласи Стејт департментот.
Полицијата во Хонг Конг издаде налози за апсење на 19 активисти кои живеат во странство, обвинувајќи ги за субверзија според строгиот закон за национална безбедност, објави претходно Ројтерс.
Тие се обвинети за организирање или учество во „Хонгконшкиот парламент“, група за која властите во азискиот финансиски центар тврдат дека имала за цел да ја собори државната власт, според закон воведен од Пекинг во 2020 година.
