Стотици демонстранти се собраа во Единбург и Абердин за да изразат противење на посетата на претседателот на Соединетите Американски Држави Доналд Трамп на Шкотска, пренесува „Индипендент“.
Демонстрантите мавтаа со транспаренти со слогани против Трамп, изразувајќи противење на неговата петдневна посета, додека некои носеа транспаренти на кои пишуваше „Слобода за Газа“ и палестински знамиња.
Поддршката за воено разурнатата енклава дојде откако Трамп вчера изјави дека признавањето на палестинската држава од страна на Франција е ирелевантно.
Во меѓувреме, Трамп отиде на голф терен во Тарнбери во југозападна Шкотска, каде што е под строг надзор на безбедносните сили.
Безбедносните проверки на терен ги извршија армијата, морнарицата и антитерористичката полиција, а полициските снајперисти се во приправност на скелињата поставени веднаш до голф теренот.
Трамп, според извештајот на „Скај њуз“, гласно ги пуштал песните „Uptown Girl“ од Били Џо, „Memory“ од Елејн Пејџ и „Bridge Over Troubled Water“ од Сајмон и Гарфанкел додека го возел својот голф-кеди по теренот.
Трамп пристигна во Шкотска во петокот вечерта, а откако пристигна на блискиот аеродром Прествик, се упати кон голф-центарот што го купи во 2014 година.
Полицијата ги затвори патиштата и го ограничи пристапот за локалното население и новинарите.
Голем број полицајци и воени лица беа забележани како ја пребаруваат областа утрово пред неговата голф игра.
Иако се очекува Трамп поголемиот дел од својот прв ден во Шкотска да го помине на голф теренот, утре треба да се сретне со претседателката на Европската комисија, Урсула фон дер Лајен, а во понеделник со британскиот премиер Кир Стармер.
Шкотланѓаните изразија намера да се соберат низ целата земја во текот на викендот за да протестираат против неговата посета.
Шкотскиот прв министер Џон Свини, кој исто така планираше да се сретне со американскиот претседател за време на неговата посета на Шкотска, ги повика луѓето да протестираат „мирно и во рамките на законот“.
