Во саботата во Берлин се одржа Парада на гордоста, која, според организаторите, собра стотици илјади учесници поради влошувањето на состојбата на ЛГБТК заедницата.
„Протестот собра повеќе учесници отколку во претходните години. Влошената општествена положба на ЛГБТК заедницата е причина за зголемената мобилизација на учесниците“, се вели во соопштението на организаторите на парадата „Ден на улицата Кристофер“ (CSD).
Оваа година, темата на парадата и на многуте транспаренти беше негативниот став на христијанско-демократските политичари од новата германска влада кон ЛГБТК заедницата, а особено спорот околу истакнувањето на виножитовото знаме на зградата на Рајхстагот, каде што се наоѓа Бундестагот.
Претседателката на Бундестагот, Јулија Клокнер (Христијанско-демократска унија ЦДУ) одби да закачи виножито знаме на Бундестагот оваа година на денот на протестот на ЦСД, како што се практикуваше во претходните години.
Нејзиниот партиски колега и германски канцелар Фридрих Мерц ја бранеше оваа одлука со изјава дека „Бундестагот не е циркус“ каде што се поставуваат секакви знамиња, што беше дочекано со остри критики.
„Затоа е важно токму сега повторно да излеземе на улиците и да испратиме сигнал за слобода, толеранција и еднаквост“, рече Томас Хофман од одборот на Берлинската асоцијација CSD. Тој, исто така, посочи на зголемувањето на насилството во Германија насочено против ЛГБТК заедницата во Германија.
Градоначалникот на Берлин, Кај Вегнер (CDU), за разлика од неговата партиска колешка Клокнер, закачи знаме во боите на виножитото на зградата на градот-држава Берлин.
„Живееме во време кога повторно сме сè повеќе сведоци на ширење на омраза. ЛГБТК заедницата доживува не само вербални, туку и физички напади. Мораме силно да се спротивставиме на ова“, рече Вегнер.
Во исто време, беше одржан десничарски контрапротест против парадата, каде што, според полицијата, се собрале само неколку десетици учесници.
Берлинскиот прајд ги слави ЛГБТК правата секоја година во Германија и е наречен и Ден на улицата Кристофер (CSD) по улицата каде што, на 28 јуни 1969 година, полицијата извршила рација во барот Стоунвол Ин во Њујорк, место за собирање на хомосексуалци кои за прв пат решиле да одговорат на бруталноста и се судриле со полицијата, па затоа CSD се нарекува и Ден на слободата.
