Американскиот претседател Доналд Трамп денес ќе го угости британскиот премиер Кир Стармер во својот имот во западна Шкотска на разговори што ќе опфатат теми од неодамна потпишаниот билатерален трговски договор до влошувањето на хуманитарната криза во Појасот Газа, објавија владите на двете земји.
Откако објави дека е постигнат голем трговски договор со Европската Унија, Трамп изрази очекување дека и Стармер ќе биде задоволен, пренесува Ројтерс.
„Премиерот на Обединетото Кралство, иако не е вклучен во ова, ќе биде многу среќен бидејќи, знаете, е постигнато одредено единство. Ќе биде многу среќен кога ќе види што сме направиле“, рече Трамп.
Стармер се надеваше дека ќе преговара со Трамп за намалување на американските тарифи за челик и алуминиум, но американскиот претседател во неделата отфрли какви било промени на тарифите од 50% за ЕУ и рече дека трговскиот договор со Велика Британија веќе е склучен.
Се очекува Стармер и Трамп да се преселат од луксузниот голф-центар на Трамп во Тарнбери, на западниот брег на Шкотска, во вториот комплекс на американскиот претседател на исток, во близина на Абердин.
