Соединетите Американски Држави ги прекинаа ограничувањата за извоз на технологија во Кина за да избегнат нарушување на трговските разговори со Пекинг и да ги поддржат напорите на американскиот претседател Доналд Трамп да обезбеди средба со претседателот Си Џинпинг оваа година, објави денес „Фајненшл тајмс“.
Весникот наведува дека Канцеларијата за индустрија и безбедност на Министерството за трговија на САД, која го надгледува и контролира извозот, во последните месеци добила инструкции да избегнува остри потези против Кина, пренесува Ројтерс.
Белата куќа и Стејт департментот не одговорија на барањата на Ројтерс за коментар на тврдењата на „Фајненшл тајмс“.
Американските и кинеските економски претставници денес треба да ги продолжат разговорите во Стокхолм за долгогодишните економски спорови што се во срцето на трговската војна меѓу двете најголеми економии во светот.
