Висината на цунами бранот во рускиот тихоокеански град Северо-Курилск надмина три метри, а најсилниот беше висок дури пет метри, соопштија службите за итни случаи.
Во Севернокурилскиот округ во рускиот Сахалински регион е прогласена вонредна состојба поради земјотрес и цунами, соопшти регионалната влада.
Земјотрес со интензитет од 8,7 степени според Рихтеровата скала го погоди рано утрово крајбрежјето на Камчатка, што е најсилниот земјотрес во регионот од 1952 година, јавува Риа Новости.
Треморите од силниот земјотрес беа почувствувани во 47 населени места во Камчатската област и Сахалин, изјави за агенцијата претставник на службите за итни случаи.
Северо-Курилск, град во Сахалинската област, беше делумно поплавен по земјотресот и последователното цунами.
Нема сериозни повреди или жртви по земјотресот во Камчатка, изјави гувернерот на Камчатската територија, Владимир Солодов.
Локалниот Оддел за хидрометеорологија и мониторинг на животната средина претходно регистрираше цунами бран висок до четири метри во регионот.
Третиот, најмоќен бран цунами ги искина бродовите од нивните сидра во пристаништето, што го поплави, како и локалниот риболовен бизнис.
Неколку лица побарале медицинска помош, ѕид се урна во една од градинките на полуостровот, а во моментот на инцидентот немало никој таму.
Според Министерството за здравство на Камчатка, сите повредени се во задоволителна состојба и без сериозни повреди.
Уште 30 земјотреси со интензитет од 2-5 степени според Рихтеровата скала веќе се регистрирани на Камчатка, а можни се и последователни потреси во рок од еден месец, вклучувајќи ги и оние со интензитет до 7,5 степени, соопшти сеизмолошката служба.
Предупредување за цунами е издадено за речиси целиот источен брег на Јапонија, Индонезија и Филипините, како и за Хаваи и неколку американски држави на западниот брег.
