Израел не дозволува доволно хуманитарна помош во Појасот Газа. Затоа, Европската комисија предложи санкции, имено исклучување на Тел Авив од програмите за поддршка на истражувањата што би ги чинеле израелските компании милиони евра. Германија и некои други земји-членки моментално се противат на санкциите.
Германија, заедно со неколку други членки на Европската Унија, го блокираше предлогот Европската Унија да го казни Израел со санкции за хуманитарната катастрофа во Појасот Газа.
Предлогот на Европската комисија од понеделник затоа е веќе заглавен во Комитетот на постојани претставници на земјите-членки, јавува агенцијата ДПА, повикувајќи се на дипломатски извори во Брисел.
Комисијата предложи итно исклучување на Израел од истражувачката програма „Хоризонт Европа“ како мерка за притисок врз Тел Авив да дозволи поголема хуманитарна помош да им пристигне на Палестинците во енклавата.
Појасот Газа е затворен на север и исток со израелската граница, на југ со египетската граница и на запад со Средоземното Море.
Израелската армија ги контролира сите граници и не дозволува доволно хуманитарна помош да стигне до населението додека се бори против Хамас.
Исклучувањето од програмата „Хоризонт Европа“ би можело да ги чини израелските компании милиони евра.
На состанокот на претставниците во Брисел, Германија, според изворите, била меѓу земјите што побарале дополнителна анализа и предложиле уште неколку дена за набљудување на ситуацијата во Појасот Газа.
Имено, од викендот, Израел донекаде ги прошири каналите за протекување на помош. Околу 220 камиони ја преминаа границата во среда.
Некои делегати предупредија дека санкциите врз Израел би можеле да го отежнат неизбежниот дијалог со властите во Тел Авив.
Најмалку 15 од 27-те земји-членки и најмалку 65 проценти од населението на ЕУ мора да гласаат за воведување санкции. Германија и Италија се клучни во овој процес.
Други големи земји од ЕУ, како и бројни помали, ја објавија својата отвореност за казнување на Израел. На состанокот на претставниците, велат изворите, многу делегации изразија поддршка за предлогот за санкции за зголемување на притисокот врз израелските власти.
Во меѓувреме, израелските медиуми објавија дека израелската влада би можела да понуди одредени отстапки за да ја спречи иницијативата за санкции.
Ова би можело да биде на маса и кога германскиот министер за надворешни работи Јохан Вадефул ќе го посети регионот во четврток.
