Вработените годинава прифатија понуди за отпремнина од администрацијата на американскиот претседател Доналд Трамп, што е дел од пошироките напори за намалување на бројот на вработени во федералните институции, потврди денес за Ројтерс извор запознаен со ова прашање.
Овој број не ги вклучува вработените кои биле отпуштени или се одлучиле за други федерални програми за намалување на платите, како што е програмата за стимулации за предвремено пензионирање.
Во замена за заминувањето, администрацијата се согласи да им исплати плати на вработените неколку месеци откако ќе престанат да работат, но сите ќе бидат отстранети од федералниот платен список до крајот на годината, нагласи изворот.
Околу 6,7 проценти од вкупната цивилна федерална работна сила поднесе оставка, како резултат на програма што ја започна во јануари милијардерот Илон Маск, поранешен советник на претседателот Доналд Трамп, кој тогаш беше раководител на Одделот за владина ефикасност.
Отпремнина им беше понудена, меѓу другото, на вработените во министерствата за земјоделство и енергетика, како и во Даночната управа и разни агенции.
„Во нормални времиња, стапката на флуктуација од 6,7 проценти не би била невообичаена за федералната влада. Но, ова не се нормални времиња. Заедно со отпуштањата на вработените на пробен период и другите големи намалувања на работната сила, програмата за одложено отпуштање длабоко го намалува капацитетот на владата“, рече Дон Мојнихан, професор на Факултетот за јавна политика „Форд“ на Универзитетот во Мичиген.
Според Партнерството за јавна служба, непрофитна организација која собира статистика за федералниот персонал, 116.000 вработени ја напуштиле владата на Соединетите Американски Држави во 2023 година, за време на администрацијата на американскиот претседател Џозеф Бајден.
