Врховниот суд на Бразил му одреди на поранешниот претседател Жаир Болсонаро, кој е на суд за заговор за државен удар, да биде ставен во домашен притвор.
Судијата Александар де Мораес во својата одлука наведе дека десничарскиот политичар не ги почитувал судските ограничувања што му беа наметнати минатиот месец, објавија агенциите.
Мораес, исто така, му забрани на Болсонаро да прима посетители, освен адвокати и лица поврзани со судот, и да користи мобилен телефон.
Ограничувањата за поранешниот бразилски претседател беа воведени поради обвинувањата дека тој побарал интервенција од американскиот претседател Доналд Трамп, кој неодамна воведе нови, високи царини за бразилски стоки, наведувајќи „лов на вештерки“ против Болсонаро.
Поранешниот бразилски претседател е обвинет за заговор со десетици негови сојузници за организирање државен удар по неговиот пораз на изборите во 2022 година.
Портпаролот на Болсонаро потврди дека тој е ставен во домашен притвор и му е забрането да го користи мобилниот телефон.
Поддржувачите на Болсонаро излегоа на улиците на неколку градови низ Бразил во текот на викендот за да протестираат против судијата на Врховниот федерален суд (STF), Александар де Мораес, и актуелниот претседател Луиз Инасио Лула да Силва.
Демонстрантите бараа амнестија за оние обвинети за учество во наводниот обид за државен удар што се случи неколку дена по инаугурацијата на Лула да Силва во јануари 2023 година, објави Ројтерс.
Во март, петчлен панел на Врховниот суд едногласно одлучи да го изведе Болсонаро пред суд по обвинение за заговор за соборување на Лула.
Доколку биде осуден, тој се соочува со неколку години затвор, а неговото судење се очекува подоцна оваа година.
Минатиот месец, судијата Де Мораес воведе дополнителни мерки против Болсонаро, тврдејќи дека тој и неговиот син Едуардо, кој моментално живее во Соединетите Држави, соработуваат со американските власти за да се мешаат во внатрешните работи на Бразил.
Во меѓувреме, администрацијата на актуелниот американски претседател Доналд Трамп воведе царини од 50% за повеќето бразилски стоки.
САД, исто така, воведоа финансиски санкции против судијата Де Мораес според Законот Магнитски, кој дозволува санкции против странски службеници за корупција или злоупотреба на човековите права.
