Договорот за враќање на мигранти меѓу Велика Британија и Франција, кој беше потпишан за време на државната посета на францускиот претседател Емануел Макрон на Велика Британија минатиот месец, стапи на сила денес.
Според договорот, мигрантите кои го преминуваат Ламанш ќе бидат вратени во Франција, додека барателите на азил со врски со Велика Британија, односно оние кои имаат семејни, работни или други врски во таа земја, ќе бидат прифатени во Велика Британија, пишува Скај њуз.
Спогодбата предвидува пилот-шема „еден внатре, еден надвор“, според која Велика Британија ќе враќа мигранти во Франција во замена за бројот на одобрени баратели на азил со врски со Велика Британија.
Европската комисија ја одобри шемата, а првите притворања се очекуваат до крајот на неделата.
Според Министерството за внатрешни работи, 25.436 мигранти ја преминале границата досега оваа година, што е за 49 проценти повеќе отколку во истиот период минатата година.
Британскиот премиер Кир Стармер и францускиот претседател Макрон го поздравија договорот како позитивен чекор во контролата на миграцијата.
Договорот дозволува секој мигрант што пристигнува со мал брод веднаш да биде приведен и сместен во центри за депортација.
Бројот на вратени мигранти, според извештаите, нема да надмине 50 неделно, но политичките аналитичари веруваат дека бројот би требало да биде поголем за да има вистинско влијание врз намалувањето на миграцијата.
Договорот, исто така, предвидува дека мигрантите чии барања за азил се одбиени ќе бидат вратени во Франција, додека бројот на мигранти кои можат легално да влезат во Велика Британија ќе биде зголемен, со строги проверки.
Пилот-проектот ќе трае до јуни 2026 година, а се очекува да се постигне долгорочен договор меѓу двете земји.
