Италијанската премиерка Џорџија Мелони изјави дека судот ја прекинал истрагата против неа откако италијанските власти ослободија либиски полициски функционер кого го бара Меѓународниот кривичен суд (МСП).
Либиецот Осама Елмасри Нџим беше ослободен во јануари и се врати дома со италијански државен авион неколку дена откако беше уапсен во Торино врз основа на потерница на МСП за наводни злосторства против човештвото, вклучувајќи убиство, тортура и силување, објави Ројтерс.
„Судиите го отфрлија случајот само против мене“, рече Мелони во објава на платформата X.
Таа беше под истрага за наводно помагање и поттикнување на кривично дело и злоупотреба на јавни средства, потсети Ројтерс.
Мелони додаде дека, според судските документи што ги добила, судиите ќе ја продолжат истрагата против министерот за внатрешни работи Матео Пјантедоци, министерот за правда Карло Нордио и потсекретарот на кабинетот Алфредо Мантовано.
„Тврдам дека оваа влада дејствува со единство под мое водство: секоја одлука, особено онаа од оваа важност, е договорена. Затоа е апсурдно да се бара Пјантедоци, Нордио и Мантовано да бидат судени, а не јас прво“, напиша Мелони.
МСП истражува наводи за сериозни злосторства извршени во Либија од граѓанската војна во 2011 година.
Министерот за правда Нордио му рече на парламентот во февруари дека Италија нема друг избор освен да го ослободи Елмасри поради грешки и неправилности во налогот за апсење, објави Ројтерс.
