Шефот на Рускиот фонд за директни инвестиции и специјален претставник на рускиот претседател за надворешна економска соработка, Кирил Дмитриев, се сретна со специјалниот претставник на американскиот претседател, Стивен Виткоф, на аеродромот Внуково, изјави за ТАСС извор близок до преговорите.
„Стивен Виткоф беше пречекан на аеродромот Внуково од специјалниот претставник на рускиот претседател, Кирил Дмитриев“, рече изворот.
Според порталот „Flightradar24“, авионот „Bombardier Global 7500“ на специјалниот претставник, кој полета од Флорида, ја преминал границата со Русија утрово во 6:11 часот по московско време, објави РИА Новости.
Портпаролката на Стејт департментот, Теми Брус, потврди дека Виткоф ќе ја посети Русија, но не коментираше конкретни детали од посетата.
Ова е петта посета на Виткоф на Русија од почетокот на годината.
Последните две посети беа на 11 и 25 април, кога се сретна со рускиот претседател Владимир Путин.
Како што претходно беше објавено, Виткоф денес ќе разговара со руското раководство во Москва.
