На некои луѓе не им е потребна временска прогноза – тие ја чувствуваат промената на времето во коските, но со години овој феномен беше отфрлен како имагинација или случајност. Сепак, со посовремени методи и огромни бази на податоци, сè повеќе научници сериозно пристапуваат кон симптомите предизвикани од метеоролошките услови, пишува „Вашингтон пост“.
Наглите флуктуации во атмосферскиот притисок, температурата и влажноста можат да го намалат нивото на кислород во крвта и да предизвикаат хормонални промени и оптоварување на кардиоваскуларниот систем. Сите овие се физиолошки одговори на телото на претстојниот ненадеен студ со врнежи.
Овие промени можат да го активираат автономниот нервен систем и да ја зголемат чувствителноста на болка, особено кај луѓето кои страдаат од хронични болести. Исто така, беа регистрирани зголемена анксиозност и нарушувања на спиењето. Новата област што се занимава со ова се нарекува метеоропатија – проучување на физиолошките реакции на промените во надворешната средина, особено атмосферскиот притисок.
Иако метеоропатијата сè уште не е формална дијагноза, научните докази сè повеќе го потврдуваат нејзиното влијание. Чувствителноста на временските промени може да предизвика мигрена, вкочанетост на зглобовите и хроничен замор.
Лекарите забележуваат влошување на симптомите кај пациентите за време на временските флуктуации, па истражувањата покажаа дека грмотевиците го зголемуваат ризикот од мигрена за 31 процент.
Како што се приближува дождот, воздушниот притисок опаѓа, влажноста се зголемува, а рецепторите во телото испраќаат сигнал до мозокот. Дури и најмалата промена може да предизвика нерамнотежа, особено кај луѓе кои страдаат од мигрена или хронична болка.
Поголемите климатски флуктуации можат да предизвикаат зголемени реакции на организмот. Зголемувањето на влажноста и падот на притисокот може да предизвикаат оток на ткивата и вкочанетост на зглобовите, симптоми што често ги пријавуваат лицата кои страдаат од артритис.
Мозокот е исто така подложен на промени: на пример, намалениот притисок во авион или за време на бура може да предизвика оток на мозокот и силни главоболки.
Врската помеѓу времето и здравјето е позната уште од Хипократ, но дури денес науката нуди конкретни докази.
