Украинскиот претседател Володимир Зеленски ги наведе петте клучни приоритети за Министерството за одбрана, вклучувајќи зголемување на уделот на домашно оружје на фронтот, дигитализација, намалување на бирократијата и решавање на проблемите со персоналот во вооружените сили на Украина.
„Извештајот на министерот за одбрана Денис Шмихал за обновувањето на тоа министерство беше поднесен во Сумската област. Првиот приоритет е максималниот број нарачки за украинските производители, така што 50 проценти од оружјето на фронтот е од наше производство“, нагласи Зеленски во видео обраќање синоќа.
Тој, исто така, ја нагласи потребата од развој на дигитални услуги и сите системи, вклучително и Делта.
Според Зеленски, потребно е и намалување на бирократијата и воспоставување јасна комуникација со бригадите и единиците во врска со нивните потреби.
„Петтото место е целиот комплекс на прашања поврзани со персоналот. Сите сме запознаени со овој проблем. Министерството за одбрана, заедно со армијата, мора да го реши“, рече тој, објави агенцијата Укринформ.
За време на посетата на Сумската област, претседателот на Украина се сретна со врховниот командант на армијата, Олександр Сирски, министерот за одбрана Шмихал и командантот на воздухопловните сили Олех Апостол.
На годишнината од почетокот на операцијата во Курската област, Зеленски се сретна и со војниците на 225-от јуришен полк во Сум, објави украинската агенција.
