Шумски пожар на периферијата на Атина беше ставен под контрола утрово, но евакуацијата на загрозените подрачја продолжи , објави Ројтерс.
Причината е што се очекуваат силни ветрови во текот на викендот.
Најмалку едно лице загина , а куќи и обработливо земјиште беа изгорени до темел вчера, додека пожарите разгорени од силни ветрови беснееја низ Грција, како во близина на главниот град, така и во регионите околу историскиот локалитет Античка Олимпија.
Најголемиот пожар избувна во малото гратче Кератеа, југозападно од главниот град, каде пожарникарите пронајдоа тело на постар маж во изгорена зграда. Портпаролот на противпожарната служба денес изјави дека пожарот таму е под контрола, но не е изгаснат.
Грција и другите медитерански земји се наоѓаат во област наречена „жариште на шумски пожари“ од страна на научниците. Пожарите се чести во текот на топлите, суви лета. Тие станаа подеструктивни во последниве години поради брзо менувачката клима, што доведе до повици за нов пристап.
Голем дел од регионот околу Атина речиси и да нема дожд со месеци.
Налети на ветер со брзина до 80 км/ч вчера ги разгореа пламените јазици околу Кератеа, запалувајќи маслинови насади. Куќите беа исто така зафатени од пламен. Полицијата одеше од врата до врата доцна во ноќта за да се осигури дека домовите се евакуирани.
Голем дел од областа тлееше и утрово.
Другите пожари во областа на Античка Олимпија и на туристичкиот остров Кефалонија, исто така, се чини дека се смириле.
