Помошникот на рускиот претседател Јуриј Ушаков денес потврди дека претседателите на Русија и САД, Владимир Путин и Доналд Трамп, ќе одржат средба во петок, 15 август, во Алјаска.
„Постигнат е договор за организирање средба на претседателите на Руската Федерација и САД на 15 август во Алјаска. Русија и САД се блиски соседи, се граничат едни со други. Се чини сосема логично нашата делегација едноставно да лета над Беринговиот теснец, а таму да се одржи толку важен и очекуван самит“, рече Ушаков, објави ТАСС.
Главна тема на разговорот ќе бидат можностите за долгорочно мирно решение на украинскиот конфликт, објави агенцијата.
Покрај тоа, лидерите ќе разговараат за економски проекти во Алјаска и Арктикот, за кои Москва и Вашингтон гледаат „одлични и меѓусебно корисни перспективи“.
Според Ушаков, наредните денови ќе бидат посветени на интензивни подготовки за политичките и практичните параметри на самитот, иако процесот „нема да биде лесен“.
Кремљ очекува следната средба меѓу Путин и Трамп по Алјаска да се одржи во Русија, а официјална покана веќе му е доставена на американскиот претседател.
Трамп претходно објави дека ќе се сретне со рускиот претседател Владимир Путин во Алјаска на 15 август за да разговара за завршување на војната во Украина.
