Украинскиот претседател Володимир Зеленски синоќа изјави дека украинската армија нема да се повлече од Донбас, бидејќи, според него, тоа би создало предуслови за нова војна и идна офанзива врз Запорожје и Дњепропетровск, како и градот Харков.
„Нема да се повлечеме од Донбас. Не можеме да го направиме ова. Сите забораваат дека нашите територии се нелегално окупирани. Донбас е отскочна даска за Русите за идна нова офанзива. Ако се повлечеме од Донбас доброволно или под притисок, ќе започнеме трета војна. Зошто?“, праша Зеленски на прес-конференција одржана во Киев, пренесува Укринформ.
Според него, Крим бил сто проценти отскочна даска за офанзива врз јужна Украина.
„Донбас би бил стопроцентна појдовна точка за тоа да не се штедат украинските граѓани, да не се користат сопствените војници, да не се спроведува никаква мобилизација (извинете што го кажувам така, но така е), туку да се претворат сепаратистите во руска армија“, нагласи Зеленски.
Тој рече дека во 2014 година Русите создале појдовна точка за идна тотална „инвазија“ во Крим и Донбас.
„По целосната инвазија, ако се повлечеме од Донбас денес, од нашите утврдувања, од нашиот терен, од височините што ги контролираме, јасно ќе отвориме појдовна точка за подготовка на руската офанзива. За неколку години, Путин ќе има отворен пат и до Запорожјето и до Днепарскиот регион. И не само тоа. И до Харков“, рече украинскиот претседател.
Затоа, според него, „прашањето за територијата не може да се одвои од безбедносните гаранции“.
„Инаку, сега сакаат да им дадат околу 9.000 квадратни километри, што е приближно 30 проценти од регионот Донецк, а ова е појдовна точка за нивната нова агресија“, нагласи Зеленски.
За време на разговорот со новинарите, украинскиот претседател претпостави дека рускиот претседател Владимир Путин веројатно ќе предложи за време на преговорите Украина да ги повлече своите трупи од Донбас во замена за други територии и прекин на огнот.
