Стапката на инфлација во Хрватска во јули беше за 4,1 процент повисока отколку во истиот месец минатата година, што го зголеми годишниот раст на потрошувачките цени трет месец по ред, објави денес Централниот завод за статистика (ДЗС).
ДЗС ја објави втората проценка на индексот на потрошувачките цени, според која инфлацијата во јули, во споредба со претходниот месец, се зголеми за 0,4 проценти, објави Poslovni.hr.
Така, по четири проценти во јануари, 3,7 во февруари и 3,2 проценти во март и април, инфлацијата го забрза својот годишен раст на 3,5 проценти во мај, 3,7 проценти во јуни, а растот продолжи и во јули.
Најголемото годишно зголемување на потрошувачките цени е постигнато во просек во категоријата ресторани и хотели и изнесува 7,6 проценти.
Потоа следуваат храната и безалкохолните пијалоци, со зголемување од 6,9 проценти, разни стоки и услуги (6,1 процент), потоа домувањето, водата, електричната енергија, гасот и другите горива (6,0 проценти), образованието (5,9 проценти), алкохолните пијалоци и тутунот (5,5 проценти), здравствената заштита (5,3 проценти) и рекреацијата и културата (5,2 проценти).
