Првата дама на Соединетите Американски Држави, Меланија Трамп, испрати лично писмо до рускиот претседател Владимир Путин, во кое изразува загриженост за киднапирањата на деца за време на војната во Украина, потврдија двајца претставници на Белата куќа.
Писмото му го предаде на Путин американскиот претседател Доналд Трамп за време на самитот во воздухопловната база Елмендорф-Ричардсон во Алјаска, изјавија претставници за Ројтерс.
Меланија Трамп, која не присуствуваше на состанокот, во писмото се осврна на тешката положба на децата погодени од војната во Украина и Русија.
Содржината на писмото не беше објавена, но претставници рекоа дека во него конкретно се споменуваат киднапирањата на деца.
Киев ја обвинува Москва за насилно преместување на десетици илјади деца на руска територија или области под руска окупација, без согласност на нивните родители или старатели.
Украинските власти го сметаат ова за воено злосторство и геноцид според дефиницијата на ОН.
Русија ги негира овие тврдења и тврди дека ги евакуирала децата од воените зони за нивна заштита.
