Сите сме наишле на куче кое ржи кога се обидувате да го погалите или ве гледа како да го вознемирувате само затоа што сте таму.
Сопствениците на кучиња понекогаш може да забележат дека нивното милениче одеднаш станало повлечено или раздразливо. Иако ова често се опишува како „намќоресто“ однесување, во реалноста, обично постојат специфични причини зад ваквите реакции – од здравствени проблеми до промени во околината, пишува „Парејд петс“.
Наместо да ја толкуваме природата на кучето на човечки начин, важно е да разбереме што всушност кучето кажува со своето однесување. Подолу, ви ги претставуваме седумте најчести причини за агресивност кај кучињата и совети како да им пристапите.
1. Непријатност и болка
Болката е една од најчестите причини зошто кучето може да изгледа раздразливо. Повредите, артритисот, забоболките или други здравствени проблеми можат да предизвикаат негативни реакции на допир или движење. Пред да го припишете однесувањето на карактерот, важно е да се исклучат медицински причини.
2. Нарушување за време на одмор
Кучињата, како и луѓето, имаат потреба од мир и одмор. Ако често се будат или се вознемируваат за време на спиењето, може да ржат или да се оддалечат. Ако ова однесување се повторува, потребно е да се провери од медицинска причина.
3. Несакан физички контакт
Некои кучиња не сакаат прегратки, галење по глава или бакнежи, особено од странци. Нарушувањето на нивниот приватен простор може да предизвика непријатност или одбранбена позиција.
4. Фрустрација поради неисполнети цели
Кучињата кои не научиле да ги контролираат своите импулси може да станат фрустрирани кога не го добиваат она што го сакаат – на пример, кога не можат да фатат верверица, кога чекаат да им фрлите топка или кога не го добиваат вашето целосно внимание.
5. Промени во рутината или околината
Кучињата ја сакаат предвидливоста и стабилноста. Ненадејните промени – преселба, нов распоред, доаѓањето на ново домашно милениче или член на семејството – можат да предизвикаат несигурност и нервоза.
6. Сензорно преоптоварување
Премногу бучава, светлина или гужви можат да го преоптоварат нервниот систем на кучето. Некои ќе се повлечат, додека други ќе одговорат со гласни лаења или ржења.
7. Стареење и когнитивни промени
Како што кучињата стареат, тие може да станат пораздразливи поради физички заболувања или когнитивни промени како што е кучешката деменција. Оваа состојба може да влијае на нивната ориентација, меморија и расположение.
