Двајца вработени во Мајкрософт се отпуштени откако учествувале во протест во седиштето на компанијата, окупирајќи ја канцеларијата на претседателот на компанијата, Бред Смит. Протестот се фокусираше на врските на Мајкрософт со Израел за време на војната во Газа, објави Ројтерс.
Портпаролот на Мајкрософт изјави дека Ана Хатл и Рики Фамели се отпуштени поради „сериозни прекршувања на политиките на компанијата“ откако учествувале во „провала во извршните канцеларии“ за време на протестот.
Тие беа меѓу седумте демонстранти, вклучувајќи поранешни вработени и лица надвор од компанијата, кои беа уапсени откако ја окупираа канцеларијата на претседателот во вторник.
Протестната група „Без Азур за Апартхејд“ го обвини Мајкрософт дека му обезбедува технологија на Израел, вклучително и неговиот софтвер Азур, кој се користи за следење и собирање податоци за Палестинците.
Во соопштението, Хатл рече дека Мајкрософт овозможува „геноцид“ во Газа, додека „го прикрива“ во рамките на компанијата.
Истрагата на „Гардијан“, „+972 Magazine“ и „Локал кол“ сугерира дека израелската војска го користи софтверот „Азур“ на „Мајкрософт“ за следење на Палестинците, вклучително и снимање телефонски повици.
Како одговор, „Мајкрософт“ најави преглед на своите процедури со помош на адвокатската фирма „Ковингтон и Бурлинг ЛЛП“.
Инцидентот не е единствениот протест во компанијата.
Во април, вработените веќе протестираа против врските на „Мајкрософт“ со Израел, а потоа двајца вработени беа отпуштени откако прекинаа говор на шефот за вештачка интелигенција на компанијата за време на прославите по повод 50-годишнината од основањето на компанијата.
