Поранешниот австриски службеник на безбедносната служба Егисто От ќе биде суден по обвинение за корупција и шпионажа за Русија , соопшти обвинителството во Виена, цитирано од Ројтерс.

От, кој работел за сега веќе непостоечката Федерална служба за заштита на уставот и борба против тероризмот (БВТ), бил уапсен во март 2024 година под сомнение за пренесување класифицирани информации. Според обвинението, помеѓу 2017 и 2021 година тој собирал тајни информации и лични податоци од полициските бази, кои ги пренесувал на бараниот поранешен менаџер на „Вајркард“, Јан Марсалек, и на претставници на руските разузнавачки служби.

Обвинителството, исто така, тврди дека От примил плаќање за своите услуги и предал специјален шифриран лаптоп од типот SINA-S , кој го користат институциите на ЕУ за безбедна комуникација. Компјутерот бил доставен до руска служба преку непознат посредник за 20.000 евра.

Јан Марсалек, роден Австриец, исчезна по банкротот на германската компанија „Вајркард“ во 2020 година, во кој доверителите изгубија речиси 4 милијарди долари. Порано оваа година, лондонски суд откри дека тој водел мрежа од бугарски шпиони во Велика Британија , дејствувајќи во име на Москва.

Скандалот со шпионите „Марсалек-От“ имаше влијание и врз минатогодишните парламентарни избори во Австрија, кога опозициските партии ја обвинија крајно десничарската Партија на слободата (ФПО) дека има премногу блиски врски со Русија. ФПО ги негираше обвинувањата, но и покрај изборната победа, не успеа да формира влада. Земјата сега е управувана од коалиција предводена од конзервативната Народна партија.