Нето добивката на рускиот енергетски гигант „Роснефт“ се намали за повеќе од 68% во првата половина од 2025 година, достигнувајќи 245 милијарди рубљи (околу 3 милијарди долари), изјави извршниот директор на компанијата Игор Сечин, цитиран од „Ројтерс“.

Според него, главната причина за падот се пониските цени на нафтата , предизвикани од зголеменото производство од страна на Саудиска Арабија и другите земји-членки на ОПЕК. „Првата половина од годината беше карактеризирана со пад на цените на нафтата, главно поради прекумерното производство. Главната причина е активното зголемување на производството од страна на земјите-членки на ОПЕК, вклучувајќи ги Саудиска Арабија, ОАЕ, Ирак и Кувајт“, нагласи Сечин.

Неговите забелешки беа еден од првите јавни сигнали за загриженост во Москва во врска со стратегијата на ОПЕК+, која оваа година го смени курсот и почна да го зголемува производството за да го врати пазарниот удел. Според извори на Ројтерс, Русија веќе изрази резерви на неодамнешните состаноци на групата, но на крајот ја поддржа одлуката за зголемување на производството за 547.000 барели дневно од септември.

Сечин, долгогодишен сојузник на претседателот Владимир Путин, долго време е скептичен во однос на соработката со ОПЕК , тврдејќи дека ограничувањата на производството им помогнале на САД да го зголемат производството и да станат водечки светски производител.

„Роснефт“ предвидува дека вишокот на глобалниот пазар на нафта ќе достигне 2,6 милиони барели дневно во четвртиот квартал од 2025 година, а во 2026 година ќе се намали на 2,2 милиони.

Сечин ја искористи приликата и да упати нов напад врз политиката на Руската централна банка, обвинувајќи ја институцијата дека со својата агресивна монетарна политика одржува превисок курс на рубљата, што дополнително го попречува извозот на нафта.