Рускиот бизнисмен Роман Абрамович е предмет на кривична постапка од страна на властите на островот Џерси поради наводи за корупција и перење пари, објави „Гардијан“, повикувајќи се на документи од Федералниот кривичен суд на Швајцарија во врска со банкарски сметки што ги побарал државниот обвинител на Џерси.
Според овие документи, властите во Џерси го истражуваат потеклото на богатството на рускиот милијардер. Во пресудите се наведува дека Абрамович „веројатно извршил коруптивни плаќања во 1990-тите“ кога го претворил Сибнефт во голема нафтена компанија . Второто обвинение се однесува на префрлање на средства во Џерси, наводно поврзано со бизнисменот, откако тој беше додаден на списокот со санкции на Велика Британија на 10 март 2022 година.
Владата на Џерси потоа објави замрзнување на средства од 7 милијарди долари, наводно поврзани со Абрамович. Средствата се наоѓаат во Џерси или им припаѓаат на компании регистрирани во оваа офшор зона, соопштија властите. Вкупното богатство на бизнисменот во тоа време се проценуваше на околу 14 милијарди долари.
Во април 2022 година, полицијата во Џерси доби налог и спроведе претреси во простории поврзани со Абрамович. Службениците за спроведување на законот запленија документи и технички уреди. Во ноември, полицијата во Џерси призна дека налогот е добиен нелегално и треба да се поништи. Органите за спроведување на законот се согласија да платат отштета и да се извинат.
