Српскиот претседател Александар Вучиќ денес изјави дека веројатно погрешил што ги нарекол европратениците на Европската Зелена партија ѓубре откако присуствувале на студентски протест во Нови Сад, но потоа рекол дека мисли многу полошо за нив.
„Велат дека ги навредив затоа што реков дека се ѓубре. Да бидам целосно искрен – мислам многу полошо за нив. Но, дали погрешив што ги нареков така, веројатно погрешив – претседателот на државата не треба да го користи тој збор во јавниот дискурс“, изјави Вучиќ за телевизијата Прва.
Според него, тие дошле да учествуваат во „насилни демонстрации, да спроведат насилство во друга земја, а потоа ја излажале и измамиле јавноста за тоа што се случило“.
Вучиќ тврди дека сите виделе што се случило на тој протест и кој кого нападнал, тврдејќи дека полицијата мирно стоела и ги издржала нападите на протестот во Нови Сад пред интервенцијата.
Зборувајќи за ситуацијата во регионот, тој оцени дека Србија ќе се соочи со големи проблеми, како што е создавањето воени сојузи во регионот.
„По воениот сојуз Тирана-Приштина-Загреб, беше создаден дополнителен воен сојуз Загреб-Љубљана. Сосема е сигурно дека ова не е создадено поради воено неутралната Австрија, туку секако поради Србија. Тие недвосмислено очекуваат и Бугарија да се приклучи (на тој сојуз)“, рече Вучиќ, додавајќи дека Србија не може да добие одговор од НАТО за овие сојузи.
Како одговор на критиките од европратениците за средбата со кинескиот претседател Си Џинпинг и рускиот претседател Владимир Путин во Кина, Вучиќ рече дека многумина не разбираат дека Србија мора да има гас оваа година.
„Можеби ми се допаѓа Путин или Русија, а можеби и не, и немам ништо против тоа да бидам целосно отворен, исто како што немам ништо против која било земја во светот, но морам да се грижам за граѓаните на Србија. Нашите граѓани мора да имаат доволно гас, нашите фабрики мора да имаат доволно гас, мора да имаме доволно електрична енергија оваа зима“, рече тој.
Според него, работа на Западот е да ги критикува неговите средби со претседателите на Русија и Кина, но Западот има и доволно гас и доволно електрична енергија.
„Ние немаме. Имаме нафта, која ја добиваме само преку еден канал – Јанаф, кој Европејците секогаш можат да го исклучат. И имаме руска рафинерија – НИС“, рече Вучиќ.
