Премиерот на Катар, Мохамед бин Абдулрахман Ал-Тани, вчера изјави дека неговиот израелски колега Бенјамин Нетанјаху мора да биде изведен пред лицето на правдата откако израелскиот напад врз лидерите на Хамас во Доха во вторник „ја уништи секоја надеж“ за ослободување на заложниците во Газа.

Ал-Тани додаде дека Катар „преиспитува сè“ во врска со својата улога како посредник во досега неуспешните разговори насочени кон прекин на огнот во конфликтот предизвикан од нападот на Хамас на 7 октомври 2023 година. Во вторникот, израелските воздухопловни сили ги таргетираа лидерите на Хамас кои се состанаа во комплекс во Доха, главниот град на сојузник на САД кој редовно е домаќин на разговори.

„Мислам дека она што го направи Нетанјаху беше да ја уништи секоја надеж за заложниците“, изјави Ал-Тани за Си-Ен-Ен, додавајќи дека Нетанјаху „мора да биде изведен пред лицето на правдата“. Нападот, исто така, предизвика ретки критики од американскиот претседател Доналд Трамп, близок сојузник на Израел, кој рече дека е „многу незадоволен“ поради тоа и дека потегот е неразумен. 

„Ако вие не ги протерате терористите, ние ќе го сториме тоа“

Нетанјаху ги предупреди катарските власти: „Им велам на Катар и на сите нации што засолнуваат терористи: или мора да ги протерате или да ги изведете пред лицето на правдата. Бидејќи ако не го сторите тоа, ние ќе го сториме тоа.“ Хамас, кој е во војна со Израел во Појасот Газа, тврди дека високите функционери што ги таргетирал преживеале, но дека шест лица биле убиени во израелските напади.

Израел, кој вети дека ќе го уништи исламистичкото движење и ќе го протера од палестинската територија од која започна напад на 7 октомври 2023 година, го десеткуваше своето раководство од почетокот на војната. Како одговор на нападот на Хамас, израелската војска започна разорна офанзива во Појасот Газа, при што загинаа десетици илјади луѓе и предизвика хуманитарна катастрофа.

„Долгата рака на Израел ќе дејствува против своите непријатели каде и да се“

Вчера, израелскиот министер за одбрана Израел Кац предупреди дека неговата земја ќе ги нападне своите непријатели насекаде. „Израелската безбедносна политика е јасна: долгата рака на Израел ќе дејствува против своите непријатели каде и да се. Нема место каде да се кријат.“

„Доколку убијците и силувачите на Хамас не ги прифатат условите на Израел за завршување на војната – пред сè ослободување на сите заложници и разоружување – тие ќе бидат уништени, а Газа ќе биде уништена“, додаде тој.