Руската служба за надворешно разузнавање (СВР) денес ја обвини Европската унија (ЕУ) и нејзините земји-членки дека стојат зад протестите во Србија, со цел да донесат на власт „послушно раководство лојално на Брисел“ и дека нивниот фокус е на „перење мозок“ на младите преку медиуми финансирани од Брисел.
„Немирите во Србија, со активно учество на младите луѓе, во голема мера се производ на субверзивните активности на Европската унија и нејзините земји-членки. Целта на европскиот либерален мејнстрим е да донесе на власт во оваа најголема балканска земја послушно раководство лојално на Брисел“, изјави СВР на својата веб-страница.
Разузнавачката агенција одговорна за активности надвор од Русија наведува дека „треба да се признае дека евроелитата постигнува многу – младите луѓе се радикализираат и преминуваат од мирни протести кон „револуционерни“ методи на борба и насилство“, но додава дека „сценариото „шарена револуција“, кое Западот успешно го тестираше во многу земји, не ги дава очекуваните резултати во Србија“.
„Крајните цели на евробирократијата не се постигнати. Главните причини за ова се силните патриотски чувства, обединувачкото влијание на Српската православна црква и сеќавањето на агресијата на НАТО, што резултираше со распад на земјата (отцепување на Косово)“, додава СВР.
Агенцијата тврди дека „евроелитата има намера да ја искористи годишнината од трагичните настани“ во Нови Сад на 1 ноември, кои станаа повод за протестните акции, за да ја свртат ситуацијата во своја корист.
„Фокусот е на „перење мозок“ на српската младина и промовирање на таканаречената „светла европска иднина“. Според добиените податоци, преку невладини организации поврзани со Брисел, значителна финансиска поддршка добиваат српските новински портали FoNet, RAM, Vreme, Južne vesti, Slobodna reč, Bum 93 (Boom93), Podrinske, Frimidija (FreeMedia), SOinfo, FAR, Storiteler (Раскажувач), како и невладината организација Link“, наведува SVR.
Вулин бара владата да го запре патот кон ЕУ по изјавата на руската тајна служба
Во соопштението се наведува и дека „Брисел очекува дека вбризгувањето средства во медиумите и невладините организации ќе го мобилизира електоратот, ќе ги изведе луѓето на улиците и ќе го заврши „српскиот Мајдан“ според сценарио кое е тестирано многу пати“.
„Сепак, лажните ветувања на европските претставници за „скоро влегување во расцутената европска градина“ се само мамка. Цената за оваа сè послаба перспектива ќе мора да се плати со освојувања и сеќавање на предците. На Европската Унија не ѝ е потребен горд и обединет српски народ.
