Луксембург има намера да ја признае државата Палестина, потврдија вчера пред парламентарниот комитет премиерот Лук Фриден и министерот за надворешни работи Ксавиер Бетел.
Според извештаите на локалните медиуми, конечната одлука за признавање се очекува подоцна овој месец на Генералното собрание на ОН во Њујорк. Потегот се координира со неколку други земји, вклучувајќи ги Франција и Белгија.
Соопштението доаѓа по месеци двоумење од страна на владата на Луксембург и во услови на растечки повици од европските лидери за прекин на израелската војна во Газа, која беше започната откако Хамас го нападна Израел на 7 октомври 2023 година.
Според локалните здравствени службеници, повеќе од 60.000 Палестинци загинале во војната. Извршната потпретседателка на Европската комисија, Тереза Рибера, ги нарече израелските акции во Газа геноцид.
ЕУ ќе заземе поцврст став
Минатата недела, претседателката на Комисијата, Урсула фон дер Лајен, објави дека извршната власт на ЕУ ќе заземе построг став кон Израел во врска со војната. Ова вклучува суспендирање на исплатите кон земјата и санкционирање на, како што ги нарече, „екстремистички министри“ и насилни доселеници.
Оваа одлука следи по гласањето на Генералното собрание на ОН минатиот петок во поддршка на декларацијата што содржи „опипливи, временски ограничени и неповратни чекори“ кон решение за две држави во регионот, пред состанокот што ќе се одржи на 22 септември.
