Полска ги повика земјите-членки на Европската унија кои сè уште купуваат руски енергетски суровини целосно да ги прекинат овие испораки до крајот на 2026 година, изјави во среда министерот за енергетика на земјата, Милош Мотика, цитиран од Ројтерс.

Во писмо до своите колеги од ЕУ, тој апелираше:

„Ве повикувам да се согласите за заедничка цел за целосно прекинување на увозот на руска сурова нафта до крајот на 2026 година. Таквата одлука би го зајакнала единството на нашите дејствија, би поставила јасен временски хоризонт и би ја демонстрирала нашата решеност да станеме независни од испораките што носат политички и стратешки ризици.“

Рускиот нафтовод „Дружба“ продолжува да испорачува нафта до Унгарија и Словачка , две земји кои сè уште одржуваат енергетски врски со Москва, иако остатокот од ЕУ ги прекина по целосната инвазија на Русија врз Украина во 2022 година.

Мотика нагласи дека неговиот повик е особено релевантен во светлината на неодамнешните настани, вклучително и влегувањето на руски беспилотни летала на полска територија минатата недела.

Претседателката на Европската комисија, Урсула фон дер Лајен, по разговорот со американскиот претседател Доналд Трамп објави дека Брисел ќе предложи забрзување на процесот на запирање на увозот на руски фосилни горива.

Досега, планот на ЕУ предвидуваше конечно прекинување на купувањето руска нафта и гас до 1 јануари 2028 година.