Најмалку 142 еколошки активисти беа убиени низ целиот свет во 2024 година, додека четворица се водат како исчезнати, според податоците на невладината организација „Глобален сведок“ со седиште во Велика Британија.
Во извештајот се наведува дека овој број е намален за околу 28 проценти во споредба со 2023 година, кога беа убиени 196 активисти.
Според организацијата, активистите најчесто се спротивставувале на рударските проекти, уништувањето на шумите, како и на земјоделските проекти пред нивната смрт, објавува „Дојче веле“.
Како што се истакнува, најопасната земја за еколошките активисти е Колумбија, каде што 48 активисти беа убиени трета година по ред.
Еколошките активисти се исто така особено изложени на ризик во Гватемала, каде што се регистрирани 20 смртни случаи, како и во Мексико, каде што беа убиени 18, и во Бразил, со 12 убиства, соопшти организацијата.
Според годишниот извештај на невладината организација, во Латинска Америка во 2024 година се документирани вкупно 117 убиства, што е 82 проценти од сите случаи во светот.
Во однос на азискиот континент, „Глобал витнес“ додаде дека Филипините регистрирале најмногу убиства, седум, по што следи Индонезија со пет убиени активисти.
Невладината организација соопшти дека во многу случаи, одговорни се членови на организиран криминал, приватни воени компании или платени убијци, додавајќи дека повеќето од убиствата остануваат неказнети.
Невладината организација соопшти дека компаниите треба да ги почитуваат правата на домородните народи, малите земјоделци и еколошките активисти, како и да обезбедат дека нема да се случуваат кршења на човековите права.
