Српскиот претседател Александар Вучиќ објави дека имал важен и значаен разговор со американскиот државен секретар Марко Рубио за зајакнување на политичкиот дијалог меѓу Србија и САД, подобрување на економската соработка и заедничките безбедносни предизвици.
„Фокусот на разговорот беше на економијата и трговијата, особено кога станува збор за решавање на прашањето за американските тарифи. Разгледавме и можноста за нови инвестиции, соработка во областа на енергетиката и новите технологии, како и перспективите што ги нуди механизмот на нашиот стратешки дијалог“, напиша Вучиќ на Инстаграм.
Тој додаде дека за време на средбата нагласил дека Србија е посветена на зачувување на мирот и стабилноста, како предуслов за секој понатамошен напредок и подобар живот за сите граѓани, изразувајќи, како што рече, благодарност за улогата на САД во заштитата на безбедноста на српскиот народ во Косово , како и за нивниот придонес во процесот на дијалог Белград-Приштина.
Вучиќ, исто така, рече дека Србија, во исто време, ја цени поддршката на САД на нејзиниот пат кон полноправно членство во Европската Унија, што, како што нагласи, „претставува една од стратешките цели на нашата земја“.
„Отворен и искрен дијалог, заснован на меѓусебна доверба и почитување, претставува најдобар пат кон зајакнување на партнерството меѓу Србија и САД. Убеден сум дека нашите односи ќе добијат уште посилен моментум во иднина, во наша заедничка корист и во интерес на мирот, стабилноста и просперитетот“, наведе Вучиќ во соопштението.
Вучиќ и Рубио разговараа за продлабочување на партнерството меѓу Србија и САД
Државниот секретар на САД, Марко Рубио, и српскиот претседател Александар Вучиќ, разговараа за продлабочување на партнерството меѓу двете земји, соопшти денес Стејт департментот.
Рубио и Вучиќ, исто така, разговараа за билатералниот стратешки дијалог меѓу Белград и Вашингтон, како и за учеството на САД на Експо 2027, на состанокот во Њујорк на маргините на Генералното собрание на Обединетите нации, се вели во соопштението. Ова беше прва официјална средба меѓу Вучиќ и Рубио, а на состанокот присуствуваше и српскиот министер за надворешни работи, Марко Ѓуриќ.
