– Францускиот претседател Емануел Макрон во вторникот на билатералната средба со американскиот претседател Доналд Трамп на маргините на Генералното собрание на ОН во Њујорк изјави дека на Газа ѝ е потребно повеќе од воено решение и дека е потребно да се фокусираме на иднината на енклавата.
„Никој не го заборава 7 октомври. Но, по речиси две години војна, каков е резултатот? Уште еднаш, тие ги убиваат врвните лидери на Хамас. Тоа функционира. Ова е големо достигнување, но во исто време, имате толку борци на Хамас колку што имавте првиот ден. Значи, „демонтирањето“ на Хамас не функционира“, рече Макрон.
Тој оцени дека ова не е правилниот начин да се продолжи и дека на Газа ѝ е потребен „целосен процес“, нагласувајќи ја потребата од план за енклавата „за следниот ден“.
Францускиот претседател нагласи дека е потребно да се ослободат сите заложници, да се постигне прекин на огнот, да се достави хуманитарна помош во Газа и да се стабилизира енклавата.
Трамп ја започна билатералната средба со пофалби за дипломатските напори на Макрон, истакнувајќи дека францускиот претседател му помогнал да спречи глобални конфликти.
„Емануел всушност ми помогна во неколку војни“, рече Трамп, одговарајќи на неодамнешната забелешка на Макрон дека Трамп би можел да ја добие Нобеловата награда за мир ако ја заврши војната во Газа, објави Си-Ен-Ен.
Кога Трамп беше прашан за неговите неодамнешни забелешки во кои ја нарече палестинската државност „подарок за Хамас“, тој го повтори својот став, тврдејќи дека таков потег му оддава почит на терористичката организација.
„Па, мислам дека му оддава почит на Хамас, а тоа не можете да го направите поради 7 октомври. Не можете да го направите тоа. Но, ние ги сакаме нашите заложници назад“, рече Трамп, алудирајќи на нападот на Хамас врз Израел во октомври 2023 година.
Макрон, кој седеше до Трамп, нагласи дека признавањето на палестинска држава не значи игнорирање на нападите на Хамас, потсетувајќи на разликата помеѓу политичкото признавање на палестинското право на постоење и насилните дејствија од страна на милитантните групи.
Франција и неколку други западни земји официјално ја признаа палестинската држава во ОН овој понеделник.
